Winter Wonderland sýningin 28.-30. nóvember - Upplýsingar

Þá er komið að loka sýningu ársins - Winter Wonderland & Íslands Winner sýningunni! Sýningin verður haldin í reiðhöll Fáks í Víðidal og er norðurlanda- og Crufts qualification sýning. Skráðir á sýninguna eru rúmlega 1.000 hundar ásamt 36 ungum sýnendum fyrir þrjá daga.

Dæmt verður í 6 sýningahringjum samtímis alla þrjá dagana. Á föstudag verður hvolpasýning og keppni ungra sýnenda, húsið opnar 17:30 og hefjast allir hringir kl. 18:00, úrslit áætluð um kl. 20:00. Á laugardag og sunnudag opnar húsið kl. 8:00 og hefjast allir dómhringir kl. 9:00. Áætlað er að úrslit hefjist kl. 14:30 laugardag og kl. 14:45 sunnudag.

FRÍTT er inn á sýninguna í boði ACANA og er því engin miðasala á staðnum, rósettusalan verður á sínum stað að venju meðan sýningunni stendur. Vekjum athygli að ekki er tekið við seðlum í rósettusölunni, einungis kortum.

Dómarar hvolpasýningarinnar eru: Astrid Lundava (Eistland), Kimmo Mustonen (Finnland), Paul Stanton (Svíþjóð), Perttu Ståhlberg (Finnland) og Sara Nordin (Svíþjóð). Svein E. Bjørnes (Danmörk) dæmir unga sýnendur.

Dómarar laugardags og sunnudags eru: Astrid Lundava (Eistland), Kimmo Mustonen (Finnland), Paul Stanton (Svíþjóð), Perttu Ståhlberg (Finnland), Sara Nordin (Svíþjóð) og Svein E. Bjørnes (Danmörk).

Hér er hægt að sjá dagskrá sýningar, PM (dagskrá hringja) og dagskrá úrslita.
Úrslit, umsagnir og sýningaskrá má finna á hundavefur.is

Við minnum á að umgengni um svæðið þarf að vera til algjörrar fyrirmyndar og hvetjum við félagsmenn til að taka upp rusl eftir sig og nýta sér ruslafötur á svæðinu, nóg er af þeim. Við erum á glænýjum teppum og við viljum geta nýtt þau aftur svo höldum svæðinu okkar hreinu.

Stjórn félagsins og sýningastjórn minna á að ekki er leyfilegt að nota ólöglegan sýningarbúnað á sýningum HRFÍ. Borist hafa athugasemdir frá dýraverndarfélögum um að félagsmenn notist enn við slíkan búnað og geta sýnendur átt von á stikkprufum á komandi sýningum þar sem hringstjóri eða annar starfsmaður sýningar fær heimild til þess að skoða sérstaklega sýningatauma/ólar sem mætt er með í hring og hefur heimild til þess að vísa sýnanda úr hring sé búnaðurinn talinn ólögmætur.

Nokkrir punktar sem fara skal yfir fyrir helgina:

• STANGLEGA BANNAÐ er að vera með hunda á reiðstígum ásamt því að leggja á reiðstígum eða við hesthúsin í hverfinu, þetta á einnig við um reiðstíginn sem liggur fyrir neðan höllina, næg bílastæði eru í kringum höllina og nóg pláss til að viðra hundana, ásamt pissusvæði innan dyra við inngang.
• Hvetjum þá sem ekki þurfa að halda í hunda að nýta sér stúkuna til að þrengja ekki um of á gólfinu – stúkan er upphækkuð og sést vel yfir hringina.
• Vinsamlegast keyrum hægt í hesthúsahverfinu - mikið var um of hraðan akstur á svæðinu á öðrum sýningum félagsins
  
• Hundar eiga ekki heima upp í stúku eða þar sem veitingasala er.
• Hundur á sýningasvæði skal vera í stuttum taumi og tryggt að hundur sé ávallt undir stjórn ábyrgðaraðila hans. Hundar mega ekki vera í útdraganlegum taumi (eins og t.d. flexi taumi).
• Þeir sýnendur sem eru með SNYRTIBORÐ með sér þurfa að vera með undirbreiðslu undir borðið. Til dæmis má nota teppi, handklæði eða plastundirbreiðslu.
• Hirða þarf upp eftir hundinn INNI OG ÚTI og þrífa með þess tilgerðum áhöldum. Pokar, sótthreinsisprey og pappír er sem fyrr að finna m.a. á borðum við hringi. Við hvetjum fólk til þess að tryggja það að ræsta hundana ÁÐUR en komið er inn í höll og benda öðrum þátttakendum á að hirða upp eftir sína hunda fari það fram hjá þeim.
• Haldið svæðinu í kringum ykkur hreinu. Með samstilltu átaki getum við sýnt og sannað að við getum verið til fyrirmyndar þegar kemur að umgengni en vitað er að það er ein helsta gagnrýni á hundahald. Okkur langar ekkert að vera úti í kulda og frosti á haust og vetrarsýningu.
• Veitingasala Æskulýðsnefndar verður á staðnum frá kl. 9-16 ásamt því að rósettusalan verður staðsett í anddyrinu á langhlið hallarinnar (rétt hjá sjoppu og básum). Vekjum athygli að ekki verður tekið við seðlum í rósettusölunni, einungis kortum.

Sýningastjórar eru Ágústa Pétursdóttir og Anna Guðjónsdóttir.

Við hlökkum til að sjá ykkur og gangi ykkur vel!