Haustsýning HRFÍ - Hvolpasýning 3. október og alþjóðlegsýning 4.-5. október

Þegar einni sýningu lýkur hefst undirbúningur fyrir næstu! Haustsýningin okkar er framundan en hún fer fram dagana 3.-5. október og verður haldin í reiðhöll Fáks í Víðidal, Reykjavík. Sýningin er alþjóðleg sýning. Áætlað er að tegundahópar 3, 4, 5, 7 og 9 verði sýndir á laugardag  og tegundahópar 1, 2, 6, 8 og 10 á sunnudag. Hvolpar verða ekki sýndir á laugardag og sunnudag, heldur á föstudag ásamt keppni ungra sýnenda. Það skal því passa að skrá á réttan viðburð þegar skráð er á sýninguna. Hvolpar og ungir sýnendur skrá á hvolpasýninguna 3. október, á meðan hundar 9 mánaða og eldri (ungliðaflokkur og uppúr) skrá á sýninguna 4.-5. október. Sjá mynd hér að neðan. Ef fólk skráir á rangan viðburð þá kemur 0 kr. fram á kvittuninni.

Dómarar helgarinnar verða: György Tesics (Ungverjaland), Markus Gisslén (Svíþjóð), Mikael Nilsson (Svíþjóð), José Homem de Mello (Portúgal), Pedro Sanches Delerue (Portúgal) og Róbert Kotlár (Ungverjaland).

Gjaldskrá 1: mánudagurinn 25. ágúst kl. 15:00
Gjaldskrá 2: mánudagurinn 8. september kl. 15:00

Ef fólki vantar tæknilega aðstoð er það hvatt til að skrá tímanlega, ekki er veitt tæknileg aðstoð utan vinnutíma. Ekki er veitt aðstoð við skráningu eftir að skráningafresti á sýninguna lýkur.

Athugið að hámarksfjöldi skráninga á sýninguna 4.-5. október er 960 skráningar og lokar skráningakerfi sjálfkrafa þegar, og ef, þeim fjölda er náð. Það gæti því gerst fyrir tilgreindan lokatíma skráningarfrests og hvetjum við fólk til að vera fyrr en seinna að skrá vilji það tryggja sér skráningu.

Umsóknir um meistaratitla, ættbókarskráningar, eigendaskipti, umskráningar á erlendum ættbókum, þurfa að hafa borist félaginu ásamt öllum viðeigandi gögnum og greiðslu Í SÍÐASTA LAGI MÁNUDAGINN 25. ÁGÚST til þess að tryggja að skráning náist.

Skráningar á sýningar HRFÍ fara fram í gegnum hundavefur.is. Skrifstofa HRFÍ er opin mánudaga til fimmtudaga frá kl. 10-15, og föstudaga frá kl. 10-13. Ekki er tekið við skráningum sem berast eftir síðasta skráningardag.

Til þess að geta skráð þarf eigandi/eigendur hunds sem skráður er á sýningu HRFÍ að vera virkur félagsmaður, með greitt árgjald, í HRFÍ, eða félagi viðurkenndu af HRFÍ, það ár sem sýningin fer fram. Ef eigandi hefur ekki greitt félagsgjald skal hafa samband við skrifstofu HRFÍ til að ganga frá greiðslu á því áður en skráð er á sýningu. Hundar skráðir á sýninguna með íslenska eigendur skulu vera skráðir í HRFÍ. Aðrir hundar verða að vera skráðir hjá öðrum hundaræktunarfélögum samþykktum af FCI. Skráning og greiðsla þarf að hafa borist félaginu áður en síðasta skráningardegi lýkur.

Ekki er hægt að millifæra fyrir sýningagjöldum í vefskráningum og skráningar eru ekki teknar gildar ef greiðsla fylgir ekki.

Dómaraáætlun fyrir sýningar félagsins má nú nálgast HÉR